चहाच्या एका कपातून उभा राहिलेला स्वप्नांचा डोंगर!

चहाच्या एका कपातून उभा राहिलेला स्वप्नांचा डोंगर!

व्यवसाय करणारे अनेक असतात, पण काही लोक असे असतात जे केवळ व्यवसाय करत नाहीत, तर व्यवसाय घडवतात. अनुभव दुबे हे त्याच ध्येयवेड्या लोकांपैकी एक. अवघ्या तीन लाख रुपयांत सुरू केलेला चहाचा स्टॉल आज तब्बल १५० कोटी रुपयांची उलाढाल करणाऱ्या ‘चाय सुट्टा बार’ या प्रसिद्ध ब्रँडमध्ये रूपांतरित झाला आहे. मात्र, या यशामागे केवळ संधी नव्हती, तर अपार कष्ट, समर्पण आणि दुर्दम्य इच्छाशक्ती होती.

अनुभव दुबे हे मध्य प्रदेशातील रेवा जिल्ह्यातील. त्यांना मोठ्या शिक्षणसंस्थेत जाऊन उच्च शिक्षण घेण्याची इच्छा होती. त्यांनी यूपीएससी परीक्षेचाही प्रयत्न केला, मात्र यश मिळाले नाही. अनेकांसाठी असे अपयश आयुष्यभराचा धक्का असतो, पण अनुभवसाठी ते नव्या संधीचं दार ठरलं. स्वतःला प्रश्न विचारला—"माझी खरी आवड नेमकी कोणती?" आणि उत्तर मिळालं—उद्योजकता.

२०१६ मध्ये त्यांनी आपल्या मित्रासोबत भागीदारी करत व्यवसाय सुरू करण्याचा निर्णय घेतला. त्यासाठी त्यांच्याकडे केवळ तीन लाखांची बचत होती. मोठ्या उद्योगाची स्वप्ने बघणाऱ्या अनुभवने सुरुवात मात्र एका साध्या चहा स्टॉलपासून केली. इंदूरमधील मुलींच्या वसतिगृहासमोर उभारलेल्या या स्टॉलला सुरुवातीला फारसा प्रतिसाद मिळाला नाही. कुठलीही जाहिरात नव्हती, व्यावसायिक कौशल्य नव्हते, परंतु एक वेगळी संकल्पना होती—मातीच्या कुल्हडमध्ये चहा द्यायचा! हा नवा प्रयोग पर्यावरणपूरक तर होताच, पण त्याला पारंपरिक भारतीय संस्कृतीचा सुगंधही होता. लोकांना हा चहा प्रिय वाटू लागला, आणि ‘चाय सुट्टा बार’ हळूहळू लोकप्रिय होऊ लागला.

व्यवसायाच्या या वाटचालीत अनेक संकटं आली. काही लोकांनी टीका केली, काहींनी टर उडवली, पण अनुभवने कुणाच्याही नकारात्मक प्रतिक्रियांकडे लक्ष दिलं नाही. त्याने चहाचे विविध २० प्रकार विकसित केले, स्वतः स्टॉलची सजावट केली, नाविन्यपूर्ण बोर्ड तयार केले आणि हळूहळू एक वेगळी ओळख निर्माण केली. त्याचा आत्मविश्वास आणि सातत्यामुळे हा छोटा उपक्रम एका मोठ्या ब्रँडमध्ये परिवर्तित झाला.

आज ‘चाय सुट्टा बार’ हा केवळ भारतातीलच नव्हे, तर परदेशातील अनेक शहरांमध्ये पोहोचला आहे. भारतात १९५ हून अधिक शहरांमध्ये त्याची उपस्थिती असून, दुबई आणि ओमानसारख्या देशांमध्येही त्याने विस्तार केला आहे. हा व्यवसाय केवळ नफा कमावणारा ठरला नाही, तर २५० हून अधिक कुंभार कुटुंबांना रोजगार मिळवून देणारा सामाजिक उपक्रमही ठरला. कुल्हड तयार करणाऱ्या कारागिरांना त्यातून नवा आधार मिळाला आणि त्यांच्या पारंपरिक कौशल्याला आधुनिक युगातही स्थान मिळालं.

अनुभव दुबे यांचा हा प्रवास प्रत्येक नवउद्योजकासाठी प्रेरणादायी आहे. अपयश येतं, अडचणी येतात, पण ज्या मनगटात मेहनतीची ताकद असते आणि ज्या मनामध्ये स्वप्नांना सत्यात उतरवण्याची जिद्द असते, त्यांना कोणतंच संकट रोखू शकत नाही. यश एका रात्रीत मिळत नाही, पण जो प्रयत्न करायचं थांबवत नाही, तो अखेर जग जिंकतोच.

एका कप चहामधून सुरू झालेली ही गोष्ट आज लाखो लोकांच्या मनाला स्पर्श करणारी आहे. अनुभव दुबे यांनी दाखवून दिलं की, मेहनतीच्या शिडीने चहाच्या कपातूनही यशाचा डोंगर सर करता येतो.