शोध शिक्षणाचा… एक प्रवास पाटील सरांचा
शोध शिक्षणाचा… एक प्रवास पाटील सरांचा
धरणगाव तालुक्यातील कल्याण खुर्द सारख्या छोट्याशा गावातून सुरू झालेली एक शिक्षणाची वाटचाल, जी आज शेकडो विद्यार्थ्यांच्या जीवनात प्रकाश टाकते आहे — ती म्हणजे आपल्या प्रिय पाटील सरांची.
एक सर्वसामान्य शेतकरी कुटुंब. मातीशी नाळ घट्ट जोडलेली. त्यातच लहानपणीच वडिलांच्या निधनाने पाटील कुटुंबाच्या आयुष्यात दुःखाचं सावट पसरलं. बालवयातच जगण्याचे वास्तव समजले. वडिलांचा आधार हरवलेला, पण त्यांचा संघर्षशील वारसा उरात साठवलेली आई — हीच पाटील सरांची खरी प्रेरणा ठरली. ती एकटीने संसाराचे ओझं वाहताना, आपल्या मुलाच्या शिक्षणासाठी कसली ही तडजोड केली नाही. आईच्या पदराला धरून चालणाऱ्या त्या लहानग्या मुलाच्या मनात त्या क्षणी एक गोष्ट खोलवर ठसली — “प्रगती हवी असेल तर शिक्षणा शिवाय पर्याय नाही.”
लहानपणापासूनच बुद्धिमान असलेल्या पाटील सरांना त्यांच्या वडिलांनी शिक्षणासाठी एरंडोलला मावशीकडे पाठवलं. गावातील मातीच्या शाळेतून सुरू झालेली शैक्षणिक यात्रा एरंडोलमध्ये नवी दिशा घेते. अभ्यासात कुशाग्र, पण परिस्थिती जेमतेम. तरी ही कधी हार न मानता, प्रत्येक अडचणीला शिक्षणाच्या तलवारीने छेद देत त्यांनी आपला मार्ग बनवला.
शिक्षक होण्याचं स्वप्न उराशी बाळगून पाटील सर धरणगावच्या पी.आर. हायस्कूल मध्ये शिक्षक म्हणून रुजू झाले. आणि मग सुरू झाला विद्यार्थ्यांच्या मनात आदराचं स्थान मिळवण्याचा प्रवास. पाटील सर म्हणजे विद्यार्थ्यांचा आपलासा शिक्षक. अभ्यासात मदतीला धावून येणारे, प्रत्येकाच्या अडचणीत खंबीरपणे पाठीशी उभे राहणारे आणि शिस्ती बरोबर माणुसकी जपणारे.
त्यांच्या बोलण्यात गोडवा आहे, पण विचारात स्पष्टता. शिक्षक म्हणून ते जितके यशस्वी आहेत, तितकेच ते एक संवेदनशील पत्रकार देखील आहेत. सामाजिक प्रश्नांवर त्यांनी नेहमी परखड भूमिका घेतली आहे, पण कधी ही कोणावर व्यक्तिगत टीका केली नाही. त्यांनी कायम 'सर्वांना घेऊन चालण्याचं' तत्त्व मनाशी बाळगलं.
शाळेतील विद्यार्थी, सहकारी शिक्षक, ग्रामस्थ — सगळ्यांच्या मनात पाटील सरां विषयी अपार आदर आहे. त्यांच्या शांत स्वभावामध्ये एक ठामपणा आहे. त्यांनी अनेक विद्यार्थ्यांना अंधारातून उजेडाकडे नेलं, केवळ शिकवून नाही तर मार्गदर्शनाने, प्रेमाने आणि विश्वासाने.
आणि आज, त्यांच्या कार्याची पोचपावती म्हणून एप्रिल महिन्यापासून त्यांची पी.आर. हायस्कूल, धरणगाव या शाळेच्या मुख्याध्यापक पदावर पदोन्नती झाली आहे. हा क्षण केवळ त्यांच्या वैयक्तिक यशाचा नाही, तर त्या प्रत्येक आईचा आहे जी मुलाच्या उज्वल भविष्यासाठी झटते. हा क्षण त्यांच्या वडिलांच्या स्वप्नांचा आहे, जे आता त्यांच्या मुलाच्या कार्यातून साकारले गेले आहेत.
पाटील सरांचं यश हे ध्येय, संघर्ष, कष्ट, आणि निष्ठेचं एक सुंदर उदाहरण आहे. त्यांनी आपली मूळ ओळख कधीच विसरली नाही. गाव, शाळा, विद्यार्थ्यांचे भवितव्य — हेच त्यांच्या आयुष्याचं ध्येय राहिलं आहे.
आज जेव्हा विद्यार्थी त्यांच्याकडे एक मार्गदर्शक म्हणून पाहतात, तेव्हा त्यांच्या डोळ्यांत फक्त आदर नसतो — तर एक श्रद्धा असते की, “आपण ही काही तरी मोठं करू शकतो.”
आणि शिक्षण देणं, म्हणजे केवळ ज्ञान देणं नसून — असा आत्मविश्वास पेरणं हेच खऱ्या शिक्षकाचं कार्य असतं, आणि ते पाटील सरांनी सिद्ध केलं आहे.
डी.एस्.पाटील सर धरणगाव: राष्ट्रीय छात्र सेना ( एनसीसी) विभागात देखील 27 वर्ष सरांनी भरीव योगदान दिले आहे दरवर्षी जिल्ह्यामध्ये एनसीसी कॅडेटला मुख्यमंत्री शिष्यवृत्ती मिळण्याचा बहुमान हा पी. आर. हायस्कूल चाच आहे असे सांगितले जाते अनेक विद्यार्थ्यांना विभागीय राज्यस्तरीय राष्ट्रीय स्तरीय शिबिरासाठी पाठवलेले आहेत.
डी.एस्.पाटील सर धरणगाव: एनसीसी माध्यमातून विद्यार्थ्यांना स्वयंशिस्त, देश प्रेम ,सामाजिक ऋण फेडण्याचे भावना रुजवण्याचं काम सरांनी केले आहे.सर शिस्तीत भोक्ते आहेत एनसीसी सोबतच स्काऊट गाईड या आंतरराष्ट्रीय चळवळीत देखील जिल्हास्तरावर आणि राज्यस्तरावर पदाधिकारी म्हणून काम करण्याची संधी सरांना मिळाली आहे. सरांचा स्वभावाने काम करण्याची पद्धत यामुळे अनेक संधी देखील चालून आलेल्या आहेत घेतलेली जबाबदारी पार पडण्याची क्षमता सरांमध्ये आहे
© दीपक पवार (संपादक) खान्देश माझा
टिप्पण्या
टिप्पणी पोस्ट करा