“प्रामाणिक पत्रकारितेचा दीपस्तंभ – कडू महाजन यांची प्रेरणादायी जीवनगाथा”

“प्रामाणिक पत्रकारितेचा दीपस्तंभ – कडू महाजन यांची प्रेरणादायी जीवनगाथा”

आज आपण एका अशा व्यक्तिमत्त्वाचा गौरव करतोय, ज्यांचे आयुष्य केवळ पत्रकारितेपुरते सीमित राहिले नाही, तर त्यांनी आपल्या लेखणीच्या माध्यमातून समाजाला दिशा देण्याचे कार्य केले. पत्रकारिता ही केवळ बातम्या देण्याचे माध्यम नसून ती समाजाशी असलेल्या नात्याची जबाबदारी ही आहे, हे ज्यांनी आपल्या प्रत्येक कृतीतून सिद्ध केले, असे हे नाव – कडू महाजन.

कडू महाजन म्हणजे एक तळमळीचा, प्रामाणिक आणि निर्भिड पत्रकार. पत्रकारिता ही केवळ व्यवसाय नाही, तर ती एक निष्ठा आणि कर्तव्य आहे, हे त्यांनी सातत्याने दाखवून दिले. त्यांच्या लेखणीतून फक्त बातम्या नव्हे, तर त्या बातम्यांमागील मानवी भावना, वेदना आणि आशा प्रकट होत गेल्या. कुठलाही विषय असो, समाजासाठी तो महत्त्वाचा वाटला की त्यांनी तो अत्यंत संवेदनशीलतेने आणि निर्भयतेने समाजासमोर मांडला.

त्यांची पत्रकारिता केवळ वर्तमानपत्रापुरती मर्यादित नाही, तर ती सामाजिक बांधिलकीची प्रचिती देणारी आहे. सामाजिक, सांस्कृतिक, शैक्षणिक, अध्यात्मिक, सहकार आणि राजकीय क्षेत्रांत त्यांनी असाधारण योगदान दिले आहे. वारकरी संप्रदायातील त्यांची निष्ठा, शेतकऱ्यांच्या प्रश्नांशी असलेली आत्मीयता आणि सहकार चळवळीतील सक्रीय सहभाग यामुळे ते अधिक मानवी आणि हृदयस्पर्शी पत्रकार ठरले आहेत.

कोविडच्या कठीण काळात, जेव्हा संपूर्ण समाज भीतीच्या सावटाखाली होता, त्या काळात महाजनसाहेबांनी स्वतःच्या सुरक्षिततेचा विचार न करता, गावभर फिरत गरजूंच्या समस्या समाजासमोर मांडल्या. त्यांच्या बातम्या केवळ माहिती देणाऱ्या नव्हत्या, तर त्या काळजाला भिडणाऱ्या होत्या. त्यांच्या लिखाणातून उमटणारी खरीखुरी भावना आणि सामाजिक जाणीव ही वाचकांमध्ये विश्वास निर्माण करणारी ठरली.

‘तरुण भारत’सारख्या प्रतिष्ठित वृत्तपत्र समूहात तब्बल २७ वर्षे सातत्याने कार्यरत राहणं ही साधी गोष्ट नव्हे. हे त्यांच्या निष्ठेचं, चिकाटीचं आणि सत्याशी असलेल्या प्रामाणिक नात्याचं उत्तम उदाहरण आहे. त्यांच्या मार्गदर्शनाखाली अनेक नवोदित पत्रकारांनी लेखणीला आत्मा दिला आणि समाजभान प्राप्त केलं.

कडू महाजन हे नाव म्हणजे वैचारिक शिस्त, चिकित्सक दृष्टीकोन आणि प्रसन्नतेने भारलेलं व्यक्तिमत्त्व. वयाच्या सदुसष्ठीच्या उंबरठ्यावर ही त्यांचा उत्साह आणि सामाजिक सक्रीय सहभाग हे तरुणांनाही लाजवणारे आहेत. त्यांच्या डोळ्यांतील तेज, चेहऱ्यावरील हास्य आणि प्रत्येकाशी असलेलं आत्मीय नातं हेच त्यांच्या ‘एव्हरग्रीन’ व्यक्तिमत्त्वाचं रहस्य आहे.

त्यांचं जीवन म्हणजे एक उघडं पुस्तक ज्यात प्रत्येक पानावर लोकहितासाठीची धडपड, प्रामाणिकपणे जगलेलं जीवन आणि समाजासाठी काही तरी देण्याची तळमळ उमटते. त्यांनी दाखवलेला आदर्श हे शिकवतो की जीवन फक्त स्वतःपुरतं नव्हे, तर इतरांसाठी ही समर्पित करावं.

महाजनसाहेबांचे विचार, समाजासाठी असलेली भावना आणि त्यांच्या लेखणीतून उमटणारी ऊर्जा ही तरुणांसाठी एक प्रेरणास्त्रोत आहे. त्यांनी जोपासलेली पत्रकारिता ही केवळ व्यवसाय नव्हे, तर ती समाजाशी असलेल्या नात्याची, विवेकबुद्धीची आणि निष्ठेची जिवंत साखळी आहे.

त्यांच्या जन्मदिवसानिमित्त त्यांच्या कार्याचा गौरव करताना, आपल्याला हे नक्कीच वाटतं की समाजात अशी माणसं असल्यानेच आशा जिवंत राहते, लोकशाही मजबूत होते आणि माणुसकी अधिक दृढ होते.

कडू महाजन साहेबांना सदुसष्ठीच्या या टप्प्यावर मनःपूर्वक वंदन! त्यांच्या पुढील जीवनात उत्तम आरोग्य, आनंद आणि निरंतर यश लाभो, हीच मनापासून शुभेच्छा.

© दीपक पवार (संपादक) खान्देश माझा