एक मुलगी, एक स्वप्न, आणि यशाची उंची....!

एक मुलगी, एक स्वप्न, आणि यशाची उंची....!

कधी कधी एखादं यश केवळ एक परीक्षा पास केल्याने नव्हे, तर त्यामागे दडलेल्या झगड्यामुळे, संयमामुळे आणि न डगमगता उभं राहण्याच्या वृत्तीमुळे मोठं वाटतं. अशाच एका यशोगाथेची नायिका म्हणजे वृषाली ललित ललवाणी.

श्रीरामपूर येथील मूळची आणि सध्या जळगावमध्ये स्थायिक झालेली वृषाली ही श्रीमती मदनबाई कचरदास ललवाणी यांची नात आणि श्री. ललित ललवाणी व सौ. सविता ललवाणी यांची गुणवंत कन्या. तिच्या यशामागे कितीतरी वर्षांचा संघर्ष, न थांबता केलेली मेहनत, आणि प्रत्येक अडचणीला संधीमध्ये बदलण्याची मानसिकता आहे.

चार्टर्ड अकाउंटंट (CA) ही परीक्षा केवळ अभ्यास करून पास होणारी नसते. ती मानसिक ताकद, वेळेचं व्यवस्थापन, अपयशातून उभं राहण्याची तयारी आणि सातत्याची कसोटी असते. वृषालीने हे सगळं लीलया पेललं आणि आज ती एक प्रमाणित चार्टर्ड अकाउंटंट म्हणून आपल्यासमोर उभी आहे.

या प्रवासात तिच्या आयुष्यात काही ठराविक व्यक्तींचे योगदान मोलाचे ठरले. सीए अनिल कोठारी, सीए रविंद्र पाटील आणि श्री. एस. आर. गोहिल या तज्ञ मार्गदर्शकांनी केवळ विषय शिकवला नाही, तर आत्मविश्वास दिला, संकटांवर मात करण्याचं बळ दिलं. त्यांच्या सल्ल्यांनी आणि प्रेरणांनी वृषालीला दिशा सापडली.

तिच्या या यशाची दखल संपूर्ण समाजाने घेतली आहे. जळगाव, पुणे, श्रीरामपूर, सिल्लोड या ठिकाणी समाज बांधवांकडून तिचा विशेष सत्कार करण्यात आला. कुणी तिला फुलांचा गुच्छ दिला, कुणी शाल उधळली, तर अनेकांनी दूरध्वनीवरून शुभेच्छांचे ओघ सुरु केले. ही सगळी कौतुकं केवळ तिच्या यशासाठी नव्हे, तर तिच्या संयमशील प्रवासासाठी होती.

वृषालीचं यश हे केवळ तिचं वैयक्तिक यश नाही, तर ती आपल्या समाजासाठी, आपल्या कुटुंबासाठी, आणि त्या प्रत्येकासाठी प्रेरणा आहे, जो स्वप्न पाहतो आणि त्या स्वप्नासाठी अहोरात्र झटतो.

आजच्या काळात, जेव्हा अनेक जण सहजतेच्या मार्गाने पुढे जातात, तिथं वृषालीने कठीण वाट निवडून जिद्दीने ती पार केली. तिचं यश म्हणजे आई-वडिलांच्या संस्कारांचं, गुरुजनांच्या आशीर्वादाचं आणि स्वतःच्या मेहनतीचं फलित आहे.

वृषालीस पुढील वाटचालीसाठी मनःपूर्वक शुभेच्छा!