मनाशी बोलणारा संवाद… जीवनशैली घडविणारे शिबिर

मनाशी बोलणारा संवाद… जीवनशैली घडविणारे शिबिर

धरणगाव येथील महात्मा फुले हायस्कूलच्या प्रांगणात त्या दिवशी नेहमीपेक्षा वेगळी ऊर्जा अनुभवास येत होती. विद्यार्थ्यांच्या चेहऱ्यावर उत्सुकतेचे प्रतिबिंब स्पष्ट दिसत होते. ती उत्सुकता परीक्षा अथवा स्पर्धेसाठी नव्हती, तर ती होती स्वतःला समजून घेण्याची, बदल स्वीकारण्याची आणि जीवनाकडे नव्या दृष्टीने पाहण्याची.

कारण त्या दिवशी शाळेमध्ये आयोजित करण्यात आले होते. किशोरवयीन संवाद व एड्स जनजागृती शिबिर.

या शिबिराचे आयोजन ग्रामीण रुग्णालय, धरणगाव यांच्या वतीने करण्यात आले होते. किशोरवयीन विद्यार्थ्यांशी संवाद साधण्यासाठी, त्यांच्या मनातील प्रश्नांना योग्य दिशा देण्यासाठी आणि त्यांना शारीरिक, मानसिक व सामाजिक आरोग्याविषयी जागरूक करण्याच्या उद्देशाने हे शिबिर अत्यंत महत्त्वपूर्ण ठरले.

कार्यक्रमाची सुरुवात उपशिक्षक श्री. एस. एन. कोळी यांच्या ओघवत्या प्रस्तावनेने झाली. अध्यक्षस्थानी शाळेचे मुख्याध्यापक श्री. जे. एस. पवार होते. प्रमुख अतिथी म्हणून ग्रामीण रुग्णालयाचे समुपदेशक श्री. ज्ञानेश्वर शिंपी, श्री. गणेश कुंभार आणि प्रयोगशाळा तंत्रज्ञ श्री. राजेश्वर काकडे उपस्थित होते.

समुपदेशक ज्ञानेश्वर शिंपी यांचे मार्गदर्शन हे केवळ माहितीपर नव्हते, तर ते विद्यार्थ्यांच्या मनाशी साधलेला एक हृदयस्पर्शी संवाद होता. त्यांनी बालपण, किशोरावस्था, प्रौढावस्था या टप्प्यांतील शारीरिक व मानसिक बदल समजावून सांगितले. किशोरवयात योग्य आहार, स्वच्छता, व्यायाम आणि चांगल्या सवयींचे महत्त्व त्यांनी अत्यंत संवेदनशील भाषेत प्रभावीपणे मांडले. त्यांनी म्हटले की "आपल्या सवयी आपले भविष्य घडवतात." हे एक वाक्य विद्यार्थ्यांच्या मनात खोलवर रूजले.

यानंतर प्रयोगशाळा तंत्रज्ञ श्री. राजेश्वर काकडे यांनी एच.आय.व्ही./एड्स विषयक अत्यंत सोप्या व वैज्ञानिक पद्धतीने माहिती दिली. समाजात या विषयाविषयी असलेले गैरसमज दूर करत त्यांनी विद्यार्थ्यांच्या मनातील शंका समर्पक व प्रामाणिक पद्धतीने दूर केल्या. विद्यार्थ्यांनी उपस्थित केलेल्या प्रश्नांवर झालेला मोकळा संवाद हा या शिबिराचा खरा गाभा ठरला.

या कार्यक्रमात प्रकर्षाने जाणवलेली गोष्ट म्हणजे ही केवळ जनजागृती नव्हती, तर संवादाची एक आशादायक सुरुवात होती. विद्यार्थ्यांनी केवळ ऐकले नाही, तर ते मनाने अनुभवले स्वतःचे शरीर, आपली जबाबदारी आणि भविष्यात घ्यावयाचे निर्णय किती महत्त्वाचे आहेत, हे त्यांनी मनोमन आत्मसात केले.

कार्यक्रमाचे सुंदर व सुसंगत सूत्रसंचालन श्री. एस. एन. ओळीत यांनी केले, तर आभारप्रदर्शन श्री. पी. डी. पाटील यांनी केले. तथापि, या कार्यक्रमाचे खरे आभार विद्यार्थ्यांच्या डोळ्यांतून उमटले.कौतुक, विचारशीलता आणि नवचेतना यांच्या रूपाने.