वागणूक कधीही खोटं बोलत नाही…..!

वागणूक कधीही खोटं बोलत नाही…..!

माणसाच्या आयुष्यात अनेक चेहरे भेटतात. काही हसरे, काही गोड बोलणारे, तर काही फारच आपुलकीने जवळ येणारे. पण या सगळ्या चेहऱ्यांच्या मागे दडलेली खरी ओळख शब्दांत नसते, ती असते वागणुकीत. कारण शब्द बोलताना माणूस सजग असतो, पण वागताना तो स्वतःला उघड करत असतो.

बोलायला प्रत्येकजण गोड बोलतो. “तू माझा आहेस”, “मी नेहमी तुझ्यासोबत आहे” असे शब्द कानावर पडले की मनाला आधार मिळतो. पण शब्दांना वजन देणं जितकं सोपं असतं, तितकंच ते निभावणं कठीण असतं. वेळ आली की तीच माणसं बदललेली दिसतात. तेव्हा कळतं, की शब्द फक्त ऐकायला सुंदर होते, त्यामागे खरं मन नव्हतं.

म्हणूनच फक्त बोलण्यावर कधीही विश्वास ठेवायचा नसतो. खरा माणूस ओळखायचा असेल तर तो अडचणीत कसा उभा राहतो, हे पाहिलं पाहिजे. तुमच्याकडे काहीच नसताना, तुम्हाला काहीच देता येत नसताना जो तुमच्यासोबत राहतो, तोच खरा आपला असतो. गरज नसताना जो जवळ असतो, तो नातं निभावत असतो.

स्वार्थी माणूस उपयोग असेपर्यंतच गोड वागतो. तो तुमच्या यशात आनंदी दिसतो, पण अपयशात दुरावतो. काम संपलं की त्याची वागणूक थंड होते. हळूहळू शब्द आणि कृती यामधला फरक जाणवू लागतो. तेव्हा मन दुखतं, पण डोळे उघडतात.

वागणुकीतून आदर दिसला, वेळ दिला गेला, आणि आपुलकी जाणवली तरच नातं खरं असतं. नातं म्हणजे फक्त शब्दांची देवाणघेवाण नाही, तर भावना, समजूत आणि साथ यांचा संगम असतो. मुखवटे फार काळ टिकत नाहीत. वेळ, परिस्थिती आणि गरज माणसाचा खरा चेहरा समोर आणतेच.

शेवटी एकच गोष्ट लक्षात राहते.माणूस किती आपला आहे हे त्याच्या बोलण्यातून नाही, तर त्याच्या कृतीतून समजतं.कारण शब्द फसवू शकतात…पण वागणूक कधीही खोटं बोलत नाही.

© दीपक पवार (संपादक) खान्देश माझा