नाती जपायची असतील तर मोठं मन हवं...!

नाती जपायची असतील तर मोठं मन हवं...!

एका चुकीच्या शब्दाकडे लक्ष देण्याऐवजी केलेल्या हजार चांगल्या गोष्टींकडे लक्ष द्या.तेव्हाच नाती कायम जपली जातात.

आयुष्याच्या प्रवासात आपल्याला अनेक माणसं भेटतात. काही आपले असतात जन्माने, काही आपले होतात प्रेमाने, तर काही न सांगता मनात घर करतात. या सगळ्या नात्यांचा एक समान धागा असतो भावना. पण या भावनाच कधी कधी चुकीच्या शब्दांत व्यक्त होतात आणि तिथेच नात्यांची परीक्षा सुरू होते.

एखादा शब्द चुकतो… पण तो शब्द बोलणारा माणूस आयुष्यभर चुकाच करत नसतो. एका क्षणात निघालेला शब्द हा रागाचा, वेदनेचा किंवा थकव्याचा परिणाम असू शकतो. पण त्या एका चुकीच्या शब्दासाठी जर आपण त्या माणसाने आपल्यासाठी केलेल्या हजार चांगल्या गोष्टी विसरलो, तर नातं तुटायला वेळ लागत नाही.

आई-वडिलांचं प्रेम कधी कठोर शब्दांत दिसतं, पण त्यांच्या मनात असलेली काळजी शब्दांपेक्षा कितीतरी मोठी असते. मित्र कधी टोचून बोलतो, पण संकटात तोच पहिला उभा राहतो. जोडीदार कधी मन दुखावतो, पण आयुष्यभर तुमचा हात सोडत नाही.या सगळ्या नात्यांमध्ये चुका होतात, पण त्या चुका झाकून टाकणारा प्रेमाचा मोठा साठा असतो.

नात्यामध्ये दुरावा येतो तो प्रेम कमी झाल्यामुळे नाही, तर आपण आठवणींचा तोल चुकीच्या बाजूने लावतो म्हणून. एक चूक मोजतो, पण शंभर प्रयत्न विसरतो. एक अश्रू आठवतो, पण हजार हास्यांचे क्षण विसरून जातो.

थोडंसं माफ करणं, थोडंसं समजून घेणं आणि थोडंसं शांत राहणं. एवढंच पुरेसं असतं नाती वाचवायला. नातं टिकवणं म्हणजे नेहमी बरोबर ठरणं नव्हे, तर कधी कधी मोठ्या मनाने सोडून देणं होय.

म्हणूनच, एका चुकीच्या शब्दाकडे लक्ष देण्याऐवजी केलेल्या हजार चांगल्या गोष्टींकडे लक्ष द्या.कारण जिथे समजूत, प्रेम आणि माफी असते, तिथे नात्यामध्ये, मैत्रीमध्ये, कुटुंबामध्ये कधीच दुरावा येत नाही. 

© दीपक पवार (संपादक) खान्देश माझा