मातीशी नाते जपणाऱ्या सेवेचा गौरवसोहळा....!

मातीशी नाते जपणाऱ्या सेवेचा गौरवसोहळा....!

शेती ही केवळ उपजीविकेचे साधन नसून ती संपूर्ण जीवनपद्धती आहे. या मातीत घाम गाळणारा शेतकरी म्हणजे बळीराजा… आणि त्या बळीराजाच्या कष्टांना दिशा देणारे, त्याच्या प्रत्येक संकटात सावलीसारखे उभे राहणारे हात म्हणजे कृषी सेवेतील निष्ठावान अधिकारी व कर्मचारी. त्यांच्या समर्पित सेवेमुळेच समाजसेवेचा खरा अर्थ अधोरेखित होतो.

जळगाव जिल्हा प्रशासनाच्या वतीने आयोजित खान्देश कृषी संस्कृती व पशु प्रदर्शन हा केवळ एक महोत्सव नव्हता, तर तो शेतकरी, शेती आणि त्यांच्या सेवेसाठी अविरत झटणाऱ्या व्यक्तींच्या कार्याचा गौरव करणारा प्रेरणादायी सोहळा ठरला. या महोत्सवात धरणगाव तालुक्यात तसेच संपूर्ण जळगाव जिल्ह्यात आत्मा यंत्रणेमार्फत उत्कृष्ट कार्य केल्याबद्दल तालुका तंत्रज्ञान व्यवस्थापक (BTM – आत्मा) दिपक पुष्पा एकनाथ नागपुरे यांचा सन्मान करण्यात आला, ही बाब निश्चितच अभिमानास्पद आहे.

दिपक नागपुरे यांनी आपल्या कार्यकाळात शेतकऱ्यांपर्यंत आधुनिक कृषी तंत्रज्ञान पोहोचवणे, शासनाच्या योजनांची प्रभावी अंमलबजावणी करणे, प्रशिक्षणाच्या माध्यमातून शेतकऱ्यांना सक्षम बनवणे तसेच प्रत्येक अडचणीत त्यांच्या सोबत खंबीरपणे उभे राहणे, हे आपले कर्तव्य मानले. त्यांच्या कार्यात केवळ प्रशासकीय जबाबदारी नाही, तर शेतकऱ्यांप्रती असलेली आत्मीयता, आपुलकी आणि निखळ सेवाभाव स्पष्टपणे जाणवतो.

धरणगाव तालुक्यासह संपूर्ण जळगाव जिल्ह्यात आत्मा यंत्रणेमार्फत राबविण्यात आलेले विविध उपक्रम, नवनवीन कृषी तंत्रज्ञानाची माहिती, सतत शेतकऱ्यांच्या संपर्कात राहून केलेले मार्गदर्शन आणि प्रशिक्षण हे त्यांच्या कार्याचे ठळक वैशिष्ट्य ठरले आहे. ऊन, वारा, पाऊस अथवा कोणत्याही संकटाची पर्वा न करता शेतकऱ्यांच्या बांधावर जाऊन दिलेला आधार आज या सन्मानाच्या रूपाने समाजासमोर आला आहे.

या उल्लेखनीय कार्याची दखल घेत जिल्हा अधिक्षक कृषी अधिकारी तथा प्रकल्प संचालक आत्मा जळगाव कुरबान तडवी, प्रकल्प संचालक डीआरडीए राजु लोखंडे, कृषी विज्ञान केंद्र प्रमुख ममुराबाद हेमंत बाहेती, प्रकल्प उपसंचालक जळगाव भरत इंगळे तसेच तालुका कृषी अधिकारी धरणगाव प्रशांत देसाई यांच्या शुभहस्ते दिपक नागपुरे यांचा सन्मान करण्यात आला.

हा सन्मान केवळ एक पुरस्कार नसून तो प्रामाणिक कष्टांची, निष्ठेची आणि सेवाभावाची पावती आहे. जिल्हा व तालुका पातळीवर मिळालेल्या या गौरवामुळे दिपक नागपुरे यांना बळीराजाच्या सेवेसाठी अधिक जोमाने, अधिक आत्मीयतेने आणि अधिक जबाबदारीने कार्य करण्याचे नवे बळ मिळाले आहे.

जेव्हा सेवा मनापासून केली जाते, तेव्हा तिचा गौरव आपोआप घडतो.दिपक नागपुरे यांचा हा सन्मान प्रत्येक कृषी सेवकासाठी प्रेरणादायी असून, शेतकऱ्यांच्या जीवनात सकारात्मक परिवर्तन घडवणाऱ्या सेवाभावी कार्याला समाजाने दिलेली ही सन्मानाची मान्यता आहे.

शेतकऱ्यांच्या डोळ्यातील आशा जपणे, त्यांच्या आयुष्यात आश्वासक बदल घडवणे, हेच त्यांच्या सेवेचे खरे यश आहे.बळीराजाच्या सेवेसाठी समर्पित असलेली ही वाट अशीच उजळत राहो…

दिपक पुष्पा एकनाथ नागपुरे यांना पुढील कार्यासाठी मनःपूर्वक शुभेच्छा!

© दीपक पवार (संपादक) खान्देश माझा