आपल्या गोड माणसांची जपणूक

 आपल्या गोड माणसांची जपणूक

आयुष्याच्या प्रवासात काही माणसं नशिबाने आपल्याला भेटतात, ज्या आपल्या जीवनाचा अविभाज्य भाग बनतात. त्यांच्या प्रेमामुळे, आधारामुळे आणि सोबतीमुळे आपलं आयुष्य अधिक सुंदर होतं. मात्र, क्षणिक त्रास, वाद किंवा गैरसमजांमुळे जर आपण या गोड नात्यांना तोडून टाकलं, तर तो फक्त एका नात्याचा अंत नसतो, तर आपल्या आयुष्यातील सर्वात सुंदर आनंद गमावल्यासारखं होतं.

ज्या नात्यांत एखादं व्यक्ती आपल्याशी हक्काने भांडू शकतं, रुसू शकतं आणि छोट्याशा समजुतीने हसवू शकतं, ते नातं खरोखरच अमूल्य असतं. अशा माणसांना जपायला हवं. कारण उद्या पैसा, संपत्ती, यश सगळं असलं तरी आपल्या भावना समजून घेणारं, हसवणारं किंवा समजावून घेणारं कोणी नसेल, तर आयुष्य कोरडं आणि नीरस वाटतं.

नाती ही आपलं खरं वैभव आहेत. ती आपल्याला आनंद देतात, कठीण प्रसंगांमध्ये आधार बनतात आणि आपल्या जीवनाला एक नवीन दिशा देतात. पण या नात्यांची जपणूक करायला आपण सहनशीलता, समजूतदारपणा आणि प्रेमाची कास धरली पाहिजे. नात्यांमध्ये क्षुल्लक गैरसमज किंवा वाद होणं अपरिहार्य आहे, पण अशा प्रसंगी नातं टिकवण्यासाठी प्रयत्न करणं हीच खरी जबाबदारी आहे.

चांगल्या हृदयाने आणि स्वभावाने फुललेली नाती कायमस्वरूपी टिकतात. अशा नात्यांमध्ये फक्त प्रेम आणि आदर असतो. संपत्ती, यश किंवा इतर गोष्टींची किंमत नात्यांसाठी नसते; नात्यांमध्ये फक्त माणुसकी आणि निष्ठा यांचा आधार असतो.

आयुष्य हे खूपच क्षणभंगुर आहे. कधी काय होईल याचा नेम नाही. म्हणून आपल्या गोड माणसांच्या नात्यांना दुखावण्यापेक्षा, त्यांचं प्रेम जपणं अधिक महत्त्वाचं आहे. एका चुकीने आपण नातं गमावलं, तर त्याच्या पोकळीत आयुष्य रिकामं वाटू शकतं. त्यामुळेच आपण नशिबाने लाभलेल्या माणसांसाठी आपलं हृदय उघडं ठेवलं पाहिजे आणि त्यांना समजून घेण्याचा प्रयत्न केला पाहिजे.

आजच्या धकाधकीच्या जगात माणसं एकमेकांसाठी वेळ देणं विसरत चालली आहेत. संवादाचा अभाव आणि गैरसमज यामुळे नाती कोमेजत चालली आहेत. पण खरी नाती टिकवण्यासाठी संवाद साधायला, वेळ द्यायला आणि प्रेम व्यक्त करायला हवं. मतभेद असले तरी त्यांना बाजूला ठेवून, आपल्या नात्यांना नवीन सुरुवात करायला हवी.

आयुष्याच्या शेवटी आपण फक्त आपल्या गोड माणसांच्या आठवणीच घेऊन जातो. म्हणूनच त्यांच्या नात्यांची जाणीव ठेवणं, त्यांची काळजी घेणं हीच आपल्या जीवनाची खरी संपत्ती आहे.

आपल्या गोड नात्यांसाठी आजच ठरवा, की आपण त्यांना जपणार, त्यांच्यासाठी वेळ देणार आणि त्यांना आपलं मानणार. नाती जपायला हवीत, कारण ती आपल्याला आयुष्याला अर्थपूर्ण बनवतात. शेवटी नशिबाने भेटलेली माणसं हीच आपली खरी कमाई असते.

© शब्दांकन: दीपक पवार (संपादक) खान्देश माझा