माणुसकीचा सुगंध जपणारा दिलदार मित्र भास्करभाऊ चौधरी....!
माणुसकीचा सुगंध जपणारा दिलदार मित्र भास्करभाऊ चौधरी....!
धरणगाव येथील सर्वसामान्य कुटुंबात जन्माला आलेले, पण मनाने मात्र श्रीमंत असलेले व्यक्तिमत्त्व म्हणजे भास्कर भाऊ चौधरी. साधेपणा, प्रामाणिकपणा आणि माणुसकी यांचा सुरेख संगम त्यांच्या स्वभावात दिसून येतो. स्वतःपेक्षा इतरांचा विचार आधी करणारे, सर्वांना सोबत घेऊन चालणारे भास्कर भाऊ म्हणजे खऱ्या अर्थाने माणूसपण जपणारा मित्र.
कधीही कुणाचं मन न दुखवता, प्रेमाने आणि आपुलकीने वागणं ही त्यांची खास ओळख आहे. त्यांच्या सहवासात आलेला प्रत्येक जण आपोआप आपलासा होतो. मित्र, नातेवाईक, ओळखीचे-अनोळखी सर्वांसाठी ते सारखेच; कारण त्यांच्या मनात भेदभावाला अजिबात स्थान नाही. संकटात आधार बनणं आणि आनंदात सहभागी होणं, हे त्यांनी शब्दांत नाही तर कृतीतून दाखवून दिलं आहे.
रोखठोकपणे आपले विचार मांडण्याची त्यांची शैली अनेकांना आवडते. स्पष्ट बोलणं हा त्यांचा स्वभाव असला तरी त्या स्पष्टतेत कटुता नसते; असते ती फक्त प्रामाणिक भावना आणि योग्य दिशा दाखवण्याची तळमळ. त्यामुळेच त्यांच्या शब्दांवर लोक विश्वास ठेवतात आणि त्यांच्या मताला मान देतात.
आज त्यांच्या वाढदिवसानिमित्त, अशा या दिलदार मनाच्या माणसाला शुभेच्छा देताना मन भरून येतं. भास्कर भाऊ, तुमचं आयुष्य असंच हसतं-खेळतं, समाधानाने आणि यशाने उजळून निघो. तुमचं आरोग्य उत्तम राहो, तुमच्या आयुष्यात आनंद, प्रेम आणि आपुलकीचा ओघ अखंड वाहत राहो.
भास्कर भाऊ चौधरी यांना वाढदिवसाच्या मनःपूर्वक हार्दिक शुभेच्छा!
© दीपक पवार (संपादक) खान्देश माझा
टिप्पण्या
टिप्पणी पोस्ट करा