शब्दांत न मावणारे कर्तृत्व प्रा. भगवान महाजन सर....!

शब्दांत न मावणारे कर्तृत्व प्रा. भगवान महाजन सर....!

जांभोरे, ता. धरणगाव येथील एका अगदी साध्या, सर्वसामान्य कुटुंबात सेवानिवृत्त प्रा. भगवान महाजन सर यांचा जन्म झाला. त्यांचे वडील शेती करून कुटुंबाचा गाडा ओढत होते. घरची परिस्थिती अत्यंत नाजूक होती. दैनंदिन जीवनात गरिबी, कष्ट, ताणतणाव आणि अनेक मर्यादा यांचा सामना करावा लागत होता. जीवनाची सुरुवातच संघर्षाने भरलेली होती.

बालपणीच आई-वडिलांचे अविरत कष्ट, त्याग आणि दुःख जवळून पाहताना त्यांच्या मनात एक ठाम विचार खोलवर रुजला“घरची परिस्थिती बदलायची असेल, तर शिक्षणाशिवाय दुसरा कोणताही मार्ग नाही.”हा विचार केवळ वाक्य न राहता त्यांच्या आयुष्याचा ध्यास बनला, जीवनाचा दीपस्तंभ ठरला.

परिस्थिती कितीही कठीण असली, तरी त्यांनी कधीही हार मानली नाही. अनेक अडचणी, अभाव आणि संकटांवर मात करत, स्वकर्तृत्वावर, प्रामाणिक परिश्रमावर आणि अखंड चिकाटीवर विश्वास ठेवून त्यांनी आपले शिक्षण पूर्ण केले. शिक्षण हेच आपल्याला आणि आपल्या कुटुंबाला अंधारातून प्रकाशाकडे नेईल, या श्रद्धेने ते अखंड झटत राहिले.

शिक्षण पूर्ण झाल्यानंतर ते पडघे येथे शिक्षक म्हणून रुजू झाले. अध्यापन हे त्यांच्यासाठी केवळ उदरनिर्वाहाचे साधन नव्हते, तर समाज घडवण्याचे एक पवित्र कार्य होते. प्रत्येक विद्यार्थी त्यांना आपला वाटत असे. शिकवताना त्यांनी केवळ अभ्यासक्रम दिला नाही, तर जीवन कसे जगावे याचे संस्कार दिले.

प्रामाणिकपणा, शिस्त, संयम, विद्यार्थ्यांबद्दलची अपार आपुलकी आणि मनापासून शिकवण्याची तळमळ यामुळे ते अल्पावधीतच विद्यार्थीप्रिय शिक्षक म्हणून ओळखले जाऊ लागले. त्यांच्या शांत, संयमी आणि अभ्यासू व्यक्तिमत्त्वाने असंख्य विद्यार्थ्यांच्या जीवनावर खोल ठसा उमटवला. त्यांच्या निष्ठावंत आणि प्रामाणिक कार्याची दखल घेत पुढे त्यांची प्राध्यापक पदावर नेमणूक झाली.

अध्यापना बरोबरच त्यांना लेखनाची ही विशेष ओढ होती. समाज, शिक्षण आणि विचारप्रवर्तनासाठी त्यांनी लेखन केले. आपल्या आयुष्यातील संघर्ष, अनुभव आणि चिंतन शब्दांतून मांडत त्यांनी तीन ते चार पुस्तके प्रकाशित केली. ही पुस्तके म्हणजे केवळ कागदावरचे शब्द नसून, एका संघर्षशील आयुष्याची साक्ष, एक प्रेरणादायी ठेवा आहे.

आज ते सेवानिवृत्त झाले असले, तरी त्यांचे कार्य थांबलेले नाही. त्यांनी दिलेले विचार, रुजवलेले संस्कार आणि त्यांनी घडवलेली असंख्य विद्यार्थीपिढी आजही समाजात विविध क्षेत्रांत आपले योगदान देत आहे. त्यांनी दिलेले शिक्षण, मूल्यांची शिदोरी आणि माणूसपणाची शिकवण हीच त्यांची खरी ओळख आहे.

आज त्यांच्या वाढदिवसानिमित्त, अशा या आदर्श शिक्षकाला, संवेदनशील मार्गदर्शकाला आणि अनेक जीवनांना उजाळा देणाऱ्या प्रेरणास्रोताला मनःपूर्वक नमन करावेसे वाटते 

सेवानिवृत्त प्रा. भगवान महाजन सर यांना वाढदिवसाच्या खूप खूप शुभेच्छा! आपले आयुष्य सदैव निरोगी, आनंदी आणि समाधानाने भरलेले राहो.आपले विचार, आपला आदर्श आणि आपली प्रेरणा अनेक पिढ्यांना अंधारातून प्रकाशाकडे नेणारी वाट दाखवत राहो…

© दीपक पवार (संपादक) खान्देश माझा