संस्कारांचा वारसा आणि लोकसेवेची नवी दिशा....!

संस्कारांचा वारसा आणि लोकसेवेची नवी दिशा....!

एरंडोलच्या भूमीत अनेक साधी, परंतु प्रेरणादायी व्यक्तिमत्त्वे जन्माला आली आहेत. त्यापैकीच एक नाव म्हणजे मयूर दिलीप महाजन लोकांच्या विश्वासावर निवडून आलेले एक तरुण नगरसेवक. साध्या कुटुंबात जन्मलेला हा तरुण आज समाजसेवेच्या मार्गावर ठामपणे वाटचाल करत आहे आणि त्यामागे आहे एका महान वारशाची प्रेरणा.

एरंडोल येथील मध्यमवर्गीय कुटुंबात मयूर महाजन यांचा जन्म झाला. घरची परिस्थिती जेमतेम असली, तरी घरात मिळालेल्या संस्कारांची श्रीमंती मात्र अपार होती. त्यांच्या घरात कायम आदराने उच्चारले जाणारे एक नाव होते.स्वर्गीय आत्माराम सयाजी महाजन. हे नाव केवळ कुटुंबापुरते मर्यादित नव्हते, तर एरंडोलच्या जनतेच्या मनातही अत्यंत सन्मानाने घेतले जात असे.

स्व. आत्माराम सयाजी महाजन हे एरंडोल नगरपरिषदेचे आदर्श लोकप्रतिनिधी होते. त्यांनी सलग पाच पंचवार्षिक काळ बिनविरोध नगरसेवक म्हणून सेवा बजावली होती आणि उपनगराध्यक्ष पदाची जबाबदारीही अत्यंत प्रामाणिकपणे पार पाडली होती.साधेपणा,प्रामाणिकपणा आणि जनतेसाठी अखंड झटण्याची वृत्ती हेच त्यांच्या आयुष्याचे ध्येय होते. त्यांच्या कार्यामुळे त्यांनी जनतेच्या मनात अढळ स्थान निर्माण केले होते.

मयूर महाजन यांनी आपल्या आजोबांना कधीच पाहिले नव्हते.त्यांच्या जन्माआधीच आजोबांचे निधन झाले होते.परंतु घरात त्यांच्या कार्याच्या कथा नेहमी सांगितल्या जात.गावातील लोक आजही आदरपूर्वक त्यांचे नाव घेतात.जेव्हा जेव्हा घरात किंवा गावात आजोबांच्या कार्याचा उल्लेख होत असे,तेव्हा त्या गोष्टींचा लहानग्या मयूरच्या मनावर खोल परिणाम होत असे.

हळूहळू त्यांच्या मनात एक स्वप्न आकार घेऊ लागले.

"आपणही एक दिवस आपल्या आजोबांसारखे लोकांसाठी काम करावे,समाजाची सेवा करावी."

बालपणी मनात रुजलेले हे स्वप्न त्यांनी जपून ठेवले. परिस्थिती साधी होती, आयुष्यात अनेक अडचणीही आल्या; परंतु समाजासाठी काहीतरी करण्याची त्यांची जिद्द कधीच कमी झाली नाही.

वयाच्या अवघ्या तिसाव्या वर्षी त्यांनी एक धाडसी निर्णय घेतला.कोणत्याही मोठ्या राजकीय पाठबळाशिवाय त्यांनी अपक्ष उमेदवारी अर्ज भरला आणि जनतेसमोर उभे राहिले.त्यांच्या पाठीशी मोठी सत्ता नव्हती, पैशांची ताकद नव्हती; पण होती ती लोकांची आपुलकी,विश्वास आणि घरातून मिळालेल्या संस्कारांची शक्ती.

एरंडोलच्या जनतेनेही त्या विश्वासाची कदर केली. जनतेने त्यांना भरभरून पाठिंबा देत नगरसेवक म्हणून निवडून दिले.हा क्षण केवळ मयूर महाजन यांच्यासाठी नव्हता,तर त्यांच्या आजोबांच्या कार्याला मिळालेला खरा सन्मान होता.जणू काही आजोबांनी पेरलेली लोकसेवेची बीजे आता नातवाच्या रूपाने पुन्हा फुलू लागली होती.

आज मयूर दिलीप महाजन हे शिवसेनेचे आमदार माननीय अमोलदादा पाटील यांचे कट्टर समर्थक म्हणून त्यांना ओळखले जाते.त्यांच्या मार्गदर्शनाखाली ते एरंडोलच्या विकासासाठी तसेच जनतेच्या समस्या सोडविण्यासाठी सातत्याने प्रयत्न करत आहेत.

आजोबांचा वारसा,घरातून मिळालेले संस्कार आणि जनतेचा विश्वास या तीन गोष्टींना सोबत घेऊन मयूर महाजन यांचा लोकसेवेचा प्रवास पुढे सुरू आहे. त्यांनी आपल्या आजोबांना कधी पाहिले नसले,तरी त्यांच्या विचारांवर चालत लोकसेवेची परंपरा पुढे नेण्याचा त्यांनी निर्धार केला आहे.

खरंच, काही नाती रक्ताने जुळतात; तर काही नाती संस्कार, आदर्श आणि प्रेरणांनी जुळलेली असतात. स्वर्गीय आत्माराम सयाजी महाजन यांनी आयुष्यभर जपलेली लोकसेवेची परंपरा आज त्यांच्या नातवाच्या कार्यातून पुन्हा उजळून निघताना दिसत आहे.

एरंडोलच्या इतिहासात ही गोष्ट कदाचित कायम स्मरणात राहील.एक नातू ज्याने कधी आपल्या आजोबांना पाहिले नव्हते, परंतु त्यांच्या पावलावर पाऊल ठेवत लोकसेवेचा वारसा अभिमानाने पुढे चालू ठेवला.

हीच खरी परंपरा…हीच खरी समाजसेवा…आणि हीच एका तरुण नगरसेवकाची प्रेरणादायी व हृदयस्पर्शी कथा.

© दीपक पवार (संपादक) खान्देश माझा