गणवेशातून घरापर्यंत साध्या कुटुंबातील देशभक्ताचे जीवन....!

गणवेशातून घरापर्यंत साध्या कुटुंबातील देशभक्ताचे जीवन....!

साकरे, तालुका धरणगाव या साध्या, शांत गावात जन्मलेले ज्ञानेश्वर साहेबराव बाविस्कर (पाटील) हे नाव आज गावासाठी अभिमानाचं प्रतीक बनलं आहे. घरची परिस्थिती अत्यंत साधी, साधनसंपत्ती मर्यादित, पण मनात स्वप्नं मोठी. वडिलांची दूध विकास फेडरेशनमध्ये सुपरवायझर म्हणून नोकरी असली तरी घर चालवताना अनेकदा आर्थिक तुटवडा भासत असे. या सर्व अडचणींमध्ये ही ज्ञानेश्वर यांच्या डोळ्यातील देशभक्तीची ज्योत कधीच मिटली नाही.

बालपणापासूनच त्यांना एकच ध्यास होता देशसेवा. गावातील सैनिकांच्या शौर्यकथा ऐकताना त्यांचे डोळे चमकायचे. गणवेशात सैनिक पाहिले की मनात फक्त एक विचार येई."एक दिवस मीही हा गणवेश अभिमानाने परिधान करीन."

वयाच्या २०व्या वर्षी त्यांनी हा ध्यास प्रत्यक्षात आणला. भारतीय सैन्यात भरती होऊन शिपाई पदावरून कारकिर्दीची सुरुवात केली. कठोर प्रशिक्षण, शिस्तबद्ध जीवन, कर्तव्यनिष्ठा आणि निस्वार्थ त्याग या सर्वाने त्यांचे व्यक्तिमत्त्व तेजस्वी बनवले.

२४ वर्षांचा प्रामाणिक सेवा प्रवास…असंख्य आठवणी, कठीण परिस्थिती, विविध पोस्टिंग्स  परंतु देशसेवेची ज्योत अखंड प्रज्वलित राहिली. प्रत्येक जबाबदारी त्यांनी प्रामाणिकपणे पार पाडली. सहकाऱ्यांसाठी ते आधारवड होते; वरिष्ठांसाठी ते विश्वासाचं दुसरं नाव होते.

शिपाई ते हवालदार या प्रवासात फक्त पदोन्नती नव्हती; हा प्रवास होता चिकाटी, मेहनत आणि निष्ठेचा. प्रत्येक यशामागे होती कर्तव्यनिष्ठा, प्रत्येक पदोन्नतीमागे होती अथक मेहनत.

२८ फेब्रुवारी २०२६ रोजी, हवालदार पदावरून त्यांनी सन्मानाने सेवानिवृत्ती स्वीकारली. हा क्षण फक्त त्यांच्या आयुष्यातील नव्हता; तो संपूर्ण कुटुंब आणि साकरे गावासाठी अभिमानाचा होता. गणवेश उतरवताना त्यांच्या डोळ्यात अभिमानाचे अश्रू, आठवणी आणि देशासाठी केलेल्या सेवेचं अपार समाधान होते.

साध्या घरातून सुरू झालेला हा प्रवास देशसेवेच्या गौरवशाली अध्यायात परिवर्तित झाला. ज्ञानेश्वर साहेबराव पाटील यांनी सिद्ध केले की परिस्थिती कितीही कठीण असली तरी स्वप्न मोठं असेल आणि प्रयत्न प्रामाणिक असतील, तर यश निश्चित मिळतं.

आज गणवेश उतरवला असला तरी त्यांच्या हृदयात देशभक्तीची ज्योत नेहमी प्रज्वलित राहणार आहे. त्यांच्या आयुष्याचा प्रवास प्रत्येक तरुणासाठी प्रेरणादायी आहे.धैर्य, चिकाटी, निष्ठा आणि देशासाठी निस्वार्थ समर्पण याचं प्रतीक.

ज्ञानेश्वर साहेबराव बाविस्कर (पाटील) यांना त्यांच्या २४ वर्षांच्या निष्ठावान, समर्पित आणि गौरवशाली देशसेवेबद्दल मनःपूर्वक सलाम! आपल्या कष्टांनी, त्यागाने आणि देशभक्तीने त्यांनी साकरे गावाचं आणि आपल्या देशाचं मान उंचावलं आहे.

© दीपक पवार (संपादक) खान्देश माझा