"शाळेच्या अंगणात आठवणींचा पुन्हा एकदा दरवळ"

"शाळेच्या अंगणात आठवणींचा पुन्हा एकदा दरवळ"

एरंडोल येथील रा. ती. काबरे विद्यालयात नुकतंच एक आगळं वेगळं स्नेहसंमेलन पार पडलं, ज्याने जवळपास तीन दशकांनंतर शाळेतील जुन्या आठवणींना पुनः उजाळा दिला. सन १९९५ मध्ये दहावी "अ" वर्गात शिक्षण घेणाऱ्या माजी विद्यार्थ्यांचा या स्नेहसंमेलनासाठी जमलेला उत्साह आणि आनंद शाळेच्या प्रांगणात भरून वाहत होता. लहानग्यांपासून मोठ्यांपर्यंत सगळ्यांच्या चेहऱ्यावर बालपणाची ओलावा आणि जुन्या दिवसांची आठवण दिसत होती.

शाळेच्या प्रांगणात सणासुदीच्या दिवशी जशी सजावट असते, तशी रंगबेरंगी रांगोळ्या, फुलाफुगे आणि आकर्षक वस्तूंनी सजवलेला वर्ग पाहून प्रत्येक माजी विद्यार्थ्याच्या डोळ्यात बालपणाचा झुळझुळता आनंद स्पष्ट दिसत होता. कार्यक्रमाची सुरुवात नेहमीप्रमाणे राष्ट्रगीत, प्रार्थना, प्रतिज्ञा आणि हजेरी घेऊन करण्यात आली. प्रत्येकाने पुन्हा एकदा विद्यार्थीदशेचा अनुभव घेतला आणि शाळेतील दिनक्रमाला एका दिवसासाठी तरी पुनरुज्जीवित केलं.

संमेलनाच्या प्रारंभाला दीपप्रज्वलन आणि सरस्वती व सावित्रीबाई फुले यांच्या प्रतिमेचं पूजन करून कार्यक्रमाला एक पवित्र आणि हळवा स्पर्श मिळाला. कार्यक्रमाची सुरुवात डॉ. शीतल पाटील यांच्या भक्तीगीताने झाली, ज्याने संपूर्ण वातावरण भक्तिमय केलं. शाळेचे संस्थापक शरदचंद्र काबरे यांनी या विद्यार्थ्यांची प्रगती पाहून मनःपूर्वक आनंद व्यक्त केला. शाळेतील माजी विद्यार्थी शिक्षण, वैद्यकीय, अभियांत्रिकी, बँकिंग, उद्योग, व्यापार, राजकीय, आणि आधुनिक शेती यांसारख्या विविध क्षेत्रांत अग्रेसर असल्याचं पाहून शाळेचा अभिमान वाढला होता.

शाळेच्या प्रगतीसाठी माजी विद्यार्थ्यांनी भेटवस्तू देऊन भविष्यातही शाळेला सहकार्य करणार असल्याचा संकल्प केला. उपस्थित सेवानिवृत्त शिक्षकांनी माजी विद्यार्थ्यांना मार्गदर्शन केले आणि त्यांच्या मनातील स्नेहभाव व्यक्त केला. विद्यार्थ्यांनी त्यांच्या शाळेतील दिवसांच्या आठवणी सांगताना गहिवरून येत शाळेतील गुरुजनांनी दिलेल्या शिकवणीचं महत्त्व अधोरेखित केलं. एका माजी विद्यार्थ्याने दिवंगत शिक्षकांच्या स्मृतीप्रित्यर्थ शाळेला आर्थिक योगदान देण्याची इच्छा व्यक्त केली, ज्याने शिक्षकांविषयी त्याच्या अंतःकरणातील आदर प्रकट केला.

या स्नेहसंमेलनाने विद्यार्थ्यांना एकमेकांसोबत जुने क्षण पुन्हा एकदा जगता आले, एकमेकांमध्ये हरवलेले हास्य, खेळ, बालपणाचा आनंद पुन्हा जिवंत झाला. अनेक वर्षांनंतर एकत्र येऊन जुन्या मित्रांना भेटण्याचा आनंद चेहऱ्यावर दिसत होता, आणि शाळेच्या त्या अंगणात आठवणींचे बहरलेले रंग दिसून येत होते.

याप्रसंगी शाळेचे माजी विद्यार्थी अतुल महाजन, केशव ठाकूर, गणेश महाजन, परेश बिर्ला, लीना देशमुख, शिल्पा कोठावदे, सुचिता मुडावदकर, धनंजय खैरनार, भिकन वाल्डे, निलेश बाहेती, अमित बिर्ला, वासुदेव तोतले, प्रेरणा मैराळ, कांचन चौधरी, वैशाली पवार, श्रद्धा बिर्ला, अमोल शहा, आशिष मानुधने, अमोल साळी, जगदीश वंजारी, सपना पलोड, सोनाली लढे, भाग्यश्री वाल्डे, सुनिता शिरोळे, नितीन विसपुते, चेतन कदम हे उपस्थित होते.

कार्यक्रमाचा समारोप राष्ट्रगीताने करण्यात आला, परंतु प्रत्येक माजी विद्यार्थी त्या आठवणींना हृदयात घेऊन घराकडे परतत होता.