भोळेपणाचा फटका: एक कठोर शिकवण

भोळेपणाचा फटका: एक कठोर शिकवण

भोळेपणाची व्याख्या करणे खरोखरच कठीण आहे. भोळ्या माणसाच्या मनात कुठले ही कपट नसते, स्वार्थाची कल्पना नसते. त्याला वाटत असते की समोरचाही माणूस तसाच प्रामाणिक आणि निःस्वार्थी असेल. मात्र, आयुष्याच्या व्यवहारात हा भोळेपणा अनेकदा मोठ्या फटक्याचे कारण ठरतो.

एका गावात दोन मित्र राहत होते. त्यापैकी एक साधा, भोळा आणि दुसरा मात्र चलाख व हुशार. त्या दोघांनी एकत्र येऊन एका शेतात ऊस लावला. मेहनतीने त्यांनी पिकाची काळजी घेतली आणि काही महिन्यांत ऊस तयार झाला. शेवटी वाटणीची वेळ आली. भोळ्या मित्राने आपल्या मित्रावर पूर्ण विश्वास ठेवून सांगितले, "तूच वाटणी कर. जी वाटणी तू करशील ती मी आनंदाने स्वीकारेन."

चलाख मित्राने या भोळेपणाचा फायदा घेतला. त्याने शेंड्याकडील भाग भोळ्या मित्राला दिला आणि स्वतः खालचा भाग ठेवला. भोळ्या मित्राला वाटले की ही वाटणी चांगली आहे, पण त्याला शेंड्याकडील भाग निरुपयोगी असल्याचे माहीत नव्हते. खालच्या भागात रस आणि पोषण होते, तर शेंड्याकडील भाग केवळ नावालाच होता. त्यामुळे भोळ्या मित्राला मोठा तोटा झाला आणि चलाख मित्राचा फायदा झाला.

ही घटना भोळ्या मित्राच्या मनावर खोल परिणाम करून गेली. त्याला आपल्या भोळेपणाचा पश्चात्ताप झाला. त्याने त्या दिवशी ठरवले की यापुढे कोणत्याही गोष्टीसाठी दुसऱ्यावर पूर्णपणे अवलंबून राहायचे नाही. स्वतः विचार करायचा, स्वतः निर्णय घ्यायचे आणि आपले हक्क बजावायचे.

या गोष्टीतून मिळणारा धडा स्पष्ट आहे. आयुष्यात कुठल्याही गोष्टीत अति भोळेपणा दाखवला तर तोटाच होतो. भोळेपणाला चांगुलपणाची किनार असली तरीही, जगातील प्रत्येक माणूस तसाच असेल असे समजणे मोठी चूक ठरते. कधी कधी हा भोळेपणा आपल्याला फार मोठ्या नुकसानाकडेही नेऊ शकतो.

म्हणूनच आयुष्यात भोळेपणाला चातुर्याची जोड देणे गरजेचे आहे. प्रत्येक गोष्टीत सतर्कता बाळगली पाहिजे, निर्णय घ्यायचे असतील तर स्वतःच्या बुद्धीचा वापर करायला हवा. दुसऱ्यावर अवलंबून राहण्या ऐवजी स्वावलंबी होणे महत्त्वाचे आहे. भोळेपणामुळे स्वभाव साधा राहील, पण सतर्कता आणि हुशारीमुळे आयुष्य अधिक सुरक्षित आणि सुकर होईल.

तर मित्रांनो, मनाचे साधेपण आणि शुद्धता राखा, पण डोळ्यांवर पट्टी बांधून चालू नका. विचारपूर्वक निर्णय घ्या आणि स्वतःवर विश्वास ठेवा. तुमचा भोळेपणा हा तुमचा दोष न होता तुमची ताकद बनावा, यासाठी चातुर्याची आणि आत्मनिर्भरतेची सोबत गरजेची आहे.

© शब्दांकन:दीपक पवार (संपादक) खान्देश माझा