सामाजिक बांधिलकी जोपासत उभं केलं आपलं विश्व: रौनक राजेश जैन

सामाजिक बांधिलकी जोपासत उभं केलं आपलं विश्व: रौनक राजेश जैन

धरणगावच्या साध्या, कष्टकरी कुटुंबात जन्मलेला रौनक राजेश जैन हा नावलौकिक मिळवलेल्या व्यक्तिमत्त्वाचं एक उत्तम उदाहरण आहे. त्यांचे वडील सोनारीचे काम करून कुटुंबाचा उदरनिर्वाह करत होते. अशा साध्या परिस्थितीतूनही रौनकने आपली स्वप्नं उंच उभारली. त्याचं बालपण सामान्य होतं, पण त्याच्या स्वप्नांना आणि कर्तृत्वाला कधीच मर्यादा नव्हत्या.

लहानपणापासूनच रौनकला सामाजिक कार्याची आवड होती. शाळेत असतानाच त्याने मित्रांना एकत्र करून स्वच्छता मोहिम राबवली, गरजू विद्यार्थ्यांना शालेय साहित्य पुरवलं, आणि पर्यावरण संवर्धनासाठी प्रयत्न केले. त्याच्या नेतृत्वगुणांमुळे आणि सामाजिक जाणिवेमुळे तो लहान वयातच इतर मुलांपेक्षा वेगळा ठरला. शालेय जीवनात त्याने वक्तृत्व, निबंधलेखन, आणि विज्ञान प्रदर्शनांमध्ये मिळवलेल्या यशाने त्याच्या आत्मविश्वासाला बळ दिलं.

बुद्धिबळ हा त्याचा विशेष आवडीचा खेळ होता. या खेळाने त्याला रणनीती आखणं, संयम राखणं, आणि विचारशक्ती वाढवणं शिकवलं, ज्याचा त्याच्या आयुष्याला मोठा फायदा झाला.

आज रौनक बंगळुरूमध्ये एका नामांकित कंपनीत अभियंता म्हणून कार्यरत आहे. परंतु त्याच्या यशाचा अर्थ फक्त वैयक्तिक उन्नतीपुरता मर्यादित नाही. आपल्या मूळ गावाशी नाळ कायम ठेवून, तो आजही समाजासाठी कार्यरत आहे. गरजू विद्यार्थ्यांना शैक्षणिक मदत देणं, विविध सामाजिक उपक्रमांसाठी निधी उभारणं आणि लोकांमध्ये जागृती निर्माण करणं यात तो नेहमीच पुढे असतो.

कोविड महामारीच्या कठीण काळात रौनकने दाखवलेल्या सामाजिक कार्याला विशेष महत्व आहे. या काळात त्याने गरजू कुटुंबांना अन्नधान्य, औषधं, आणि आर्थिक मदत पुरवली. रुग्णालयांसाठी आवश्यक साहित्य आणि उपकरणं देण्यामध्येही त्याचा मोलाचा वाटा होता. त्याच्या या कार्यामुळे अनेक गरजूंच्या चेहऱ्यावर आशेचा किरण झळकला.

रौनकचं साधं आणि सच्चं व्यक्तिमत्त्व हे त्याच्या यशाचं खरं गमक आहे. मोठ्या पदावर कार्यरत असूनही तो कधीही दिखावा करत नाही. आपल्या मित्रांसाठी तो नेहमीच "जिवलग मित्र" राहिला आहे. अडचणीच्या क्षणी त्याने अनेकदा आपल्या मित्रांना आधार दिला आहे, आणि म्हणूनच तो मित्रमंडळीत प्रचंड लोकप्रिय आहे.

रौनकचं जीवन हे एक प्रेरणादायी उदाहरण आहे, जे दाखवून देतं की सामाजिक बांधिलकी जोपासत आणि प्रामाणिकपणे मेहनत करून आपलं जग सुंदर करता येतं. धरणगावसारख्या छोट्या गावातून सुरू झालेला त्याचा प्रवास आज अनेकांना प्रेरणा देतो. तो फक्त एक अभियंता नाही, तर समाजासाठी सतत झटणारा एक हिरो आहे.

रौनक राजेश जैनला मनापासून सलाम, कारण त्याच्या कर्तृत्वाची ज्योत फक्त त्याच्या घरापुरती मर्यादित नसून, ती समाजासाठी एक प्रेरणादायी प्रकाशझोत आहे!

© शब्दांकन: दीपक पवार (संपादक) खान्देश माझा