दिलदार मित्रांचा दिलदार मित्र – सरपंच स्व.विशाल (भिकू) चव्हाण

दिलदार मित्रांचा दिलदार मित्र – सरपंच स्व.विशाल (भिकू) चव्हाण 

काही माणसं आपल्या जीवनाचा अविभाज्य भाग बनून जातात. त्यांच्या सहवासाने आयुष्य उजळतं, आणि त्यांची अनुपस्थिती ही जाणवत राहते. जांभोरे, तालुका धरणगाव येथील स्वर्गीय विशाल चव्हाण, उर्फ भिकू, हे असेच एक हृदयाच्या जवळचं व्यक्तिमत्त्व होतं. प्रेमळ स्वभाव, मदतीसाठी सदैव तत्पर आणि सर्वांना आपलंसं करणारी त्यांची वृत्ती आजही प्रत्येकाच्या मनात जिवंत आहे.

विशाल चव्हाण हे केवळ नाव नव्हतं, तर ते एक भावना होती. त्यांच्या आठवणींचा एक मोठा दरवाजा उघडला, की आठवतो माणसं जोडणारा, हसतमुख, दिलदार मित्र. कोणतीही अडचण असो, संकट असो, भिकू दादा कधीही मागे हटत नव्हते. त्यांच्या व्यक्तिमत्त्वाची एक जादू होती – ज्यामुळे ते लोकांच्या मनात कायमचे घर करून गेले.

तरुणांचा ते विशेष लाडके होते. त्यांचं प्रेम आणि आपुलकी हीच त्यांची खरी ओळख होती. संपूर्ण तालुक्यात त्यांना "भिकू" या प्रेमळ नावाने ओळखलं जायचं. हे नाव म्हणजे फक्त एक ओळख नव्हती, तर त्यामागे एक विश्वास, एक अतूट नातं होतं. त्यांचा मोठा परिवार हा त्यांच्या घरापुरता सीमित नव्हता, तर संपूर्ण जांभोरे आणि तालुक्यातील लोक त्यांना कुटुंबासारखंच मानायचे.

आजही त्यांची आठवण येते, त्यांचं हसणं आठवतं, त्यांची दिलदार वृत्ती आठवते. काळाने त्यांना आपल्यातून नेलं असलं तरी त्यांच्या आठवणी अजून ही जिवंत आहेत. त्यांच्या सहवासात आलेल्या प्रत्येकाने त्यांच्या प्रेमळ स्वभावाचा अनुभव घेतला आहे. विशाल दादा हे केवळ एक व्यक्ती नव्हते, तर माणुसकीचं प्रतीक होते.

त्यांची जागा कुणीच भरू शकत नाही, पण त्यांचे धाकटे भाऊ अ‍ॅडव्होकेट शुभम चव्हाण भावाच्या पावलांवर पाऊल ठेवत आज त्याच मार्गावर चालत आहेत. ते ही भावासारखेच मनमिळावू, मदतीसाठी तत्पर आणि सर्वांशी आपुलकीने वागणारे आहेत. शुभम दादांच्या वागण्यात आणि बोलण्यात भिकू दादांची झलक दिसते. जणू काही विशाल दादा नवीन रूपात पुन्हा आपल्यात आले आहेत.

काही माणसं जग सोडून जातात, पण त्यांचे विचार आणि संस्कार अजरामर होतात. विशाल दादांचा प्रेमळ स्वभाव आणि त्यांच्या दिलदार मित्रत्वाची आठवण प्रत्येकाच्या मनात घर करून आहे. भिकू दादांचं नाव, त्यांची माणसं जोडण्याची ताकद आणि त्यांच्या आठवणी सदैव आपल्या हृदयात राहतील.

अशा या लाडक्या भिकू दादांना भावपूर्ण श्रद्धांजली!

© शब्दांकन: दीपक पवार (संपादक) खान्देश माझा

मो.9370165997