शून्यातून विश्व उभारणारे शिवदास वामन पाटील : कष्टाच्या मातीतील सोनं
शून्यातून विश्व उभारणारे शिवदास वामन पाटील : कष्टाच्या मातीतील सोनं
प्रत्येक यशस्वी व्यक्तीमागे एक संघर्षमय कथा असते. परंतु काही कथा केवळ संघर्षापुरत्या मर्यादित राहत नाहीत, तर त्या इतरांना प्रेरणा देणाऱ्या ठरतात. ‘ओम साई मार्बल, कन्नड पीशोर’ जिल्हा संभाजीनगर या व्यवसायाचे संचालक शिवदास वामन पाटील यांची याच प्रकारची कथा आहे — साधेपणात जन्मलेली, कष्टात फुललेली आणि यशात नांदणारी.
शिवदासरावांचा जन्म जळगाव जिल्ह्यातील एरंडोल तालुक्यातील दापोरी या लहानशा गावात, एका अत्यंत साध्या आणि सामान्य शेतकरी कुटुंबात झाला. वडील शेती करीत असत. मात्र, शिवदासराव अजून लहान असतानाच वडिलांचं छत्र हरपलं. वडिलांच्या अकाली निधनामुळे संपूर्ण घराचा भार त्यांच्या आईच्या खांद्यावर आला.
एका आईसाठी हे ओझं अत्यंत कठीण होतं — स्वतःचा संसार, पोरंबाळं, उद्याची चिंता, समाजाची नजर... या साऱ्या गोष्टींनी तिचं आयुष्य व्यापून गेलं.
शिवदासरावांनी लहानपणीच हे सगळं समजून घेतलं. त्यांच्या डोळ्यांसमोर आईचे कष्ट सतत साकार व्हायचे. ते पाहून त्यांच्या मनात एक निश्चय होत गेला — घराची प्रगती हवी असेल, तर कष्टाशिवाय पर्याय नाही.
घरची परिस्थिती इतकी हलाखीची होती की तिसरी इयत्तेनंतर त्यांना शिक्षण सोडावं लागलं. इतर मुले जेव्हा दप्तर खांद्यावर घेऊन शाळेच्या दिशेने जात असत, तेव्हा शिवदासराव मात्र झोळी खांद्यावर टाकून कामाच्या शोधात गावाच्या बाहेर पडत.
त्यांचं बालपण खेळात नव्हे, तर कष्टात गेले. लहान वयातच त्यांनी घराबाहेर पडून मिळेल ते काम स्वीकारलं. वीटभट्टी, बांधकाम मजुरी, हातगाडी ओढणे, लहानमोठी कामं... जेव्हा त्यांच्या वयातील इतर मुले खेळण्यात दंग असत, तेव्हा शिवदासराव कष्टात रमलेले असत.
मात्र त्यांनी कधीही तक्रार केली नाही. त्यांच्या चेहऱ्यावर नेहमी समाधान दिसायचं. कारण एकच — आईच्या चेहऱ्यावर हास्य फुलवायचं होतं.
असं म्हणतात, प्रामाणिक कष्टाला नियती ही झुकते. शिवदासरावांनी कधीही फसवणूक केली नाही, खोटं बोललं नाही. त्यांनी आपल्या प्रत्येक कामात प्रामाणिकपणाचं आणि सचोटीचं बीज पेरलं.
हळूहळू त्यांचा प्रामाणिकपणा आणि मेहनत ओळखली जाऊ लागली. जिथे काम करत, तिथे विश्वासाचं नातं निर्माण करत. हाच विश्वास आणि कठोर श्रम हे त्यांच्या पुढील यशाचं पायाभूत कारण ठरले.
हळूहळू त्यांनी स्वतःचा अनुभव, कमी पडणारे पैसे आणि न डगमगणारी जिद्द यांच्या जोरावर ओम साई मार्बल हा व्यवसाय उभा केला.
आज, ज्या ठिकाणी मोठमोठे उद्योगपती पोहोचण्यासाठी झगडत आहेत, तिथे एका सामान्य गावकरी तरुणाने स्वतःचं स्थान निर्माण केलं आहे.
शिवदास वामन पाटील केवळ एक यशस्वी उद्योजक नाहीत, तर अनेकांसाठी प्रेरणेचा स्रोत ठरले आहेत. त्यांनी स्वतःसाठीच नव्हे, तर अनेकांसाठी रोजगार आणि आत्मसन्मानाचे दार उघडले आहे.
त्यांची जीवनगाथा आपल्याला शिकवते की — शिक्षण, पैसा वा मोठे पाठबळ नसले तरी, कष्ट, जिद्द आणि प्रामाणिकपणा या तिन्ही गोष्टी जर असेल, तर कोणते ही स्वप्न साकार होऊ शकते.
शिवदासरावांचे आयुष्य हेच सिद्ध करते की, मातीशी जोडलेली माणसं ही आभाळाला गवसणी घालू शकतात. त्यांच्या प्रत्येक कष्टाचा थेंब आज त्यांच्या यशाच्या तेजस्वी सूर्यप्रकाशात झळकत आहे.
© दीपक पवार (संपादक) खान्देश माझा
टिप्पण्या
टिप्पणी पोस्ट करा