"डॉ. चंद्रकांत पाटील – एक माणूस, एक प्रेरणा"

"डॉ. चंद्रकांत पाटील – एक माणूस, एक प्रेरणा"

काही व्यक्ती आपल्या जीवनात अशा येतात की त्या आयुष्यभर आपल्या मनात घर करून राहतात. त्यांच्या बोलण्यात गोडवा असतो, वागण्यात माणुसकी असते आणि त्यांच्या अस्तित्वातून एक आत्मिक उब सतत अनुभवायला मिळते. अशी माणसं फारच कमी असतात जिथे शब्द कमी आणि कृती मोठी असते. अशाच माणसांपैकी एक म्हणजे ताडे गावाचे लाडके सुपुत्र, दिलदार मनाचे मालक, आदरणीय डॉ. चंद्रकांतजी पाटील.

"डॉक्टर" हा शब्द जिथे जीवनदायी ठरतो, तिथे डॉ. चंद्रकांतजींच्या व्यक्तिमत्त्वामुळे हाच शब्द एका वेगळ्याच उंचीवर पोहोचतो. कारण ते केवळ शरीराचे उपचार करणारे डॉक्टर नाहीत, तर मनाच्या जखमांवर हळुवार फुंकर घालणारे आणि समाजासाठी आधारस्तंभ ठरणारे एक जिवंत श्रद्धास्थान आहेत. कोणाचेही दु:ख पाहिले की त्यांना ते स्वतःचे वाटते, आणि कोणाच्या डोळ्यांत पाणी दिसले की त्यांच्या हृदयाच्या गाभ्यात एक वेदनेची लहर उठते.

आजच्या या यांत्रिक आणि धकाधकीच्या जगात जिथे माणूस माणसाशी बोलणं विसरतो आहे, तिथे डॉ. चंद्रकांतजींचं प्रेमळ हास्य, त्यांचे सुसंवाद, आणि त्यांच्या डोळ्यांतील आत्मियता ही खरंच समाजासाठी एक आशेची किरण आहेत. त्यांनी आपले संपूर्ण जीवन इतरांसाठी जपले, जगले आणि अर्पण केले. डॉक्टर होऊन पैसे कमवणं वेगळं, पण डॉक्टर होऊन समाजाचा हात धरून चालणं ही फार मोठी आणि सन्मानास पात्र गोष्ट आहे. ही गोष्ट त्यांनी केवळ सांगितली नाही, तर प्रत्यक्ष कृतीतून दाखवून दिली आहे.

वयाने ते ज्येष्ठ असले तरी मनाने ते आजही तरुण आहेत. गावातील तरुणांना योग्य दिशा दाखवण्यासाठी त्यांचे मार्गदर्शन म्हणजे जणू प्रेरणादायी दीपस्तंभ. त्यांच्या बोलण्यात सकारात्मकता असते, आणि ते नेहमीच म्हणतात "तू करू शकतोस", "मी आहे तुझ्या पाठीशी". अशा शब्दांनी अनेक तरुणांना उभारी मिळाली आहे.

त्यांच्या घरी कोणताही पाहुणा गेला, की त्याने ओळखीचा असो वा अनोळखी, डॉ. साहेब त्याला आपुलकीने विचारपूस करतात. अन्न, पाणी, औषधं, सल्ला त्यांच्या उंबरठ्यावर आलं की हक्काने मिळतं.

ताडे गाव हे केवळ त्यांचं जन्मस्थान नाही, तर ते त्यांच्या मनाचा श्वास आहे. गावात काहीही अडचण निर्माण झाली, की ते सर्व कामं बाजूला ठेवून ताडेची वाट धरतात. गावकऱ्यांच्या सुख-दु:खात सहभागी होणं, हे त्यांनी नेहमीच आपलं प्रथम कर्तव्य मानलं आहे. कोणालाही अडचण आली की मदतीचा हात पुढे करायचा ही त्यांची सहज वृत्ती आहे.

त्यांच्या हातून कितीतरी गरीब रुग्णांना मोफत वैद्यकीय सेवा लाभली आहे. गरज पडली की गावकऱ्यांच्या तोंडून जे नाव सहजपणे बाहेर पडतं, ते म्हणजे डॉ. चंद्रकांत पाटील.

त्यांच्या जीवनशैलीत कोणताही दिखावा नाही, फक्त एक साधेपणा आहे. पण त्याच साधेपणात त्यांचा मोठेपणा अधिक ठळकपणे जाणवतो. ते कधीच कोणालाही कमी लेखत नाहीत, उलट एखादा खचलेला दिसला की त्याला उभं करणं, आधार देणं, हा त्यांच्या स्वभावाचा एक अविभाज्य भाग आहे.

आज त्यांच्या वाढदिवसाच्या निमित्ताने, त्यांना केवळ शुभेच्छा देऊन थांबणे अपूर्ण वाटते. त्यांच्या प्रत्येक कृतीसाठी, त्यांच्या प्रेमळ स्वभावासाठी आणि समाजासाठी केलेल्या योगदानासाठी आपण कृतज्ञता व्यक्त केली पाहिजे.

त्यांच्या हास्यासाठी आभार कारण त्या हास्यामध्ये विश्वास आहे.

त्यांच्या मदतीसाठी आभार कारण त्या मदतीत माणुसकी आहे.

त्यांच्या प्रामाणिक आणि संयमी जीवनशैलीसाठी आभार कारण ती आजच्या पिढीसाठी आदर्श ठरते.

आजचा दिवस त्यांच्या प्रेमासाठी, त्यागासाठी, सेवेसाठी आणि समर्पणासाठी एक छोटासा नम्र प्रणाम आहे.

डॉ. चंद्रकांतजी पाटील यांना वाढदिवसाच्या मन:पूर्वक शुभेच्छा!

त्यांचे आरोग्य उत्तम राहो, आयुष्य दीर्घ, समृद्ध आणि प्रेरणादायी असो.

त्यांचे आशीर्वाद आणि मार्गदर्शन आम्हा सर्वांवर सदैव राहो, हीच ईश्वरचरणी प्रार्थना.

आपण आहात म्हणूनच ताडे गावाला आजही एक हसतं-फुलतं, प्रेमळ आणि दिलदार मन लाभलं आहे.

खरंच, "दिलदार मनाचा दिलदार मित्र" ही उपमा कुणाला द्यायची असेल, तर ती फक्त आणि फक्त – डॉ. चंद्रकांतजी पाटील यांनाच शोभून दिसते.

 © दीपक पवार (संपादक) खान्देश माझा