वाईट दिवसांत दडलेले चांगले क्षण....!

वाईट दिवसांत दडलेले चांगले क्षण....!

जीवन ही एक प्रवाही नदी आहे कधी शांत, तर कधी प्रचंड वेगाने वाहणारी. या प्रवासात काही दिवस सुखाचे असतात, काही दुःखाचे. पण चार दिवस वाईट आले म्हणून खचून जायचं नाही. कारण हेच वाईट दिवस आपल्या आयुष्यातील सर्वात मौल्यवान शिकवण घेऊन येतात. या काळातच आपली खरी ताकद आणि आपल्या नात्यांची खरी ओळख पटते.

जोडीदार म्हणजे फक्त आनंदाच्या क्षणी सोबत चालणारा नव्हे, तर दुःखाच्या वादळातही आपल्या सोबत खांद्याला खांदा लावून उभा राहणारा सखा सुखात सगळे सोबत असतात, पण संकटाच्या क्षणी फक्त आपला

जीवाभावाचा साथीदारच आपल्याला साथ देतो. आणि तिथेच समजतं हा फक्त आयुष्याचा सहप्रवासी नाही, तर सात जन्मांचा सखा आहे.

जेव्हा आयुष्य अवघड वाटू लागतं, जेव्हा प्रत्येक दिशा अंधारलेली दिसते, तेव्हा जर आपल्या जोडीदाराचा हात हातात असेल, तर अंधारही प्रकाशमान वाटतो. वाईट दिवसांत दोघांनी मिळून घेतलेली झुंज ही नात्याला अधिक मजबूत करते. कारण खरी नाती संकटातूनच फुलतात. जेव्हा एकाचं मन खचतं, तेव्हा दुसरं त्याला आधार देतं, आणि हीच परस्परांची साथ जीवनाचा सर्वात मोठा आशीर्वाद ठरते.

वाईट दिवस हे शिक्षा नसतात, ते आपल्याला नवीन रूपात घडवणारे अनुभव असतात. ते शिकवतात की संयम, विश्वास आणि प्रेम यांची शक्ती कोणत्याही संकटावर मात करू शकते. प्रत्येक कठीण प्रसंगात एखादा धडा दडलेला असतो, आणि त्या धड्यातच पुढील आयुष्यातील आनंदाची बीजे असतात. म्हणूनच म्हणतात याच वाईट दिवसांमध्ये चांगले दिवस लपलेले असतात; फक्त त्यांना ओळखण्याचं शहाणपण आपल्या मनात असायला हवं.

जीवनात कधी कधी परिस्थिती इतकी कठीण होते की पुढे काय होईल हे ही कळत नाही. पण जर आपल्या जोडीदाराचा हात घट्ट धरला असेल, तर मनात एक वेगळीच ताकद निर्माण होते. त्या एका नजरेतून, एका शांत स्पर्शातून मिळणारा आत्मविश्वास संपूर्ण जग जिंकू शकतो. कारण प्रेमाचं खरं रूप हे केवळ हसण्यात नाही, तर अश्रूंमध्ये ही एकमेकांना समजून घेण्यात आहे.

वाईट दिवस संपतात, पण त्या काळात दिलेली साथ, दिलासा आणि प्रेम हे कायम मनात कोरलं जातं. हेच अनुभव पुढील प्रवासात नात्याला अधिक घट्ट बांधतात. म्हणून संकट आलं की घाबरू नका, उलट मनाशी ठरवा. “आपण दोघं आहोत, आणि आपण हे वादळ पार करू.”

शेवटी, आयुष्याचं खरं सौंदर्य हे परिपूर्ण क्षणांमध्ये नसून, अपूर्ण दिवसांतही एकमेकांच्या साथीत हसण्यात आहे. जोडीदारासोबत चाललेला प्रत्येक कठीण टप्पा हेच प्रेमाचं खरं प्रमाण आहे. आणि म्हणूनच, चार दिवस वाईट आले म्हणून खचू नका. कारण त्याच वादळाच्या मागेच तुमच्या जीवनाचा सर्वात सुंदर सूर्योदय दडलेला आहे. 

© दीपक पवार (संपादक) खान्देश माझा