समरसतेची दीपशिखा डॉ.मनिषा महाजन....!
समरसतेची दीपशिखा डॉ.मनिषा महाजन....!
समाजात वाढणारी दुरावलेली नाती, स्पर्धेच्या वेगात हरवणारी मानवी संवेदना आणि ताणतणावांच्या गर्दीत हरवू लागलेली माणुसकी या सगळ्यातून वाट काढत एखादी व्यक्ती समाजासाठी आशेचा दीप पेटवते, तेव्हा त्या प्रकाशाचा तेजस्वी झोत दूरवर पसरतो. जळगाव जिल्ह्यातील वराड गावातील श्री व सौ दयाबाई रघुनाथ महाजन यांची कन्या, आणि विखरण गावातील कै. दगडू लक्ष्मण महाजन व ग. भा. मनकर्णाबाई दगडू महाजन यांची सून, तसेच विलास दगडू माळी यांची पत्नी असलेल्या मनिषा महाजन यांनी मिळवलेली विद्यावाचस्पती पदवी हा असाच एक प्रेरणादायी प्रकाशपुंज आहे.
कवयित्री बहिणाबाई चौधरी उत्तर महाराष्ट्र विद्यापीठ, जळगाव येथे हिंदी विषयात विद्यावाचस्पती म्हणजेच पीएचडी हा मान प्राप्त करून मनिषा महाजन यांनी केवळ स्वतःचे स्वप्न पूर्ण केले नाही, तर दोन गावांचा अभिमान उंचावला आहे. “राष्ट्रकवी मैथिलीशरण गुप्त तथा राष्ट्रसंत तुकडोजी महाराज की काव्य मे अभिव्यक्त समरसता बोध: तुलनात्मक अध्ययन (भारत-भारती एवं ग्रामगीता के विशेष परिप्रेक्ष्य में)” या गंभीर आणि अत्यंत महत्त्वपूर्ण विषयावर त्यांनी केलेले संशोधन त्यांच्या अभ्यासातील समरसता, समाजोन्मुखता आणि मूल्यनिष्ठ अभ्यासू वृत्तीचे प्रतीक आहे.
भाषा अभ्यास प्रशाळा व संशोधन केंद्र, कवयित्री बहिणाबाई चौधरी उत्तर महाराष्ट्र विद्यापीठ, जळगाव येथील, सध्या भारत सरकारच्या केंद्रीय हिंदी संस्थान, आग्रा येथे संचालक म्हणून कार्यरत प्रो. सुनील बाबुराव कुलकर्णी यांच्या मार्गदर्शनाखाली त्यांनी आपला शोध प्रवास पूर्ण केला. त्यांच्या मार्गदर्शनाने, आणि मनिषा महाजन यांच्या सातत्यपूर्ण परिश्रमांनी मिळून, समरसतेच्या मोलाच्या मूल्यांची उकल करणारा हा अभ्यास साकारला.
आजच्या जागतिकीकरणाच्या काळात माणूस तंत्रज्ञानाने जोडला जातो, पण हृदयाने दूर जातो.अशा परिस्थितीत विषमता दूर करणे, माणसामाणसातील ताणतणाव कमी करणे, आणि मानवी एकता, तादात्म्य व बंधुत्वाची भावना पुन्हा जागवणे हे मोठे आव्हान आहे. हाच ध्यास मनिषा महाजन यांनी आपल्या संशोधनाद्वारे जिवंत ठेवला आहे. राष्ट्रकवी मैथिलीशरण गुप्त यांच्या ‘भारत-भारती’ आणि राष्ट्रसंत तुकडोजी महाराज यांच्या ‘ग्रामगीता’ या दोन साहित्यरत्नांमधून प्रकट झालेल्या समरसतेच्या विचारांची त्यांनी केलेली तुलना समाजासाठी एका दिशादर्शक दीपस्तंभासारखी आहे.
या अभ्यासाची विद्यापीठाने केलेली दखल आणि प्रदान केलेली पदवी ही त्यांच्या ज्ञाननिष्ठ प्रवासाची मूल्यवान पावती आहे. या यशामुळे वराड आणि विखरण गावांत आनंदाची लहर पसरली. कुटुंबीय, मित्रपरिवार, आणि संपूर्ण गावकऱ्यांनी मनिषा महाजन यांचे कौतुकाने अभिनंदन केले. त्यांच्या डोळ्यातला आनंद, आणि मनातील अभिमान या क्षणाची साक्ष देत होता.
मनिषा महाजन यांनी दाखवलेले परिश्रम, सातत्य, माणुसकी आणि अभ्यासाची निष्ठा हे प्रत्येक तरुणासाठी मार्गदर्शक आहेत. त्यांचे यश सांगून जाते.शिक्षण म्हणजे फक्त पदवी नव्हे, तर समाज घडवण्याचे आणि मूल्य जागवण्याचे सामर्थ्य आहे.
वराड आणि विखरण गावांचे आज नाव उजळले आहे; कारण मनिषा महाजन यांनी आपल्या शिक्षणाने केवळ स्वतःची ओळख निर्माण केली नाही, तर समरसतेसारख्या अत्यंत आवश्यक मानवी मूल्यांची ज्योत अधिक उजळ केली आहे.
डॉ. मनिषा महाजन या आपल्या समर्पित संशोधनातून समाजासाठी विचारांची, मूल्यांची आणि मानवी एकतेची ज्योत तेवत ठेवणाऱ्या खऱ्या अर्थाने समरसतेची दीपशिखा ठरल्या आहेत.
© दीपक पवार (संपादक) खान्देश माझा
टिप्पण्या
टिप्पणी पोस्ट करा