स्वतःमधील शक्तीला जागे करा....!

स्वतःमधील शक्तीला जागे करा....!

मनुष्याच्या मनात एक अदृश्य दीप प्रज्वलित असतो.

शक्तीचा, सामर्थ्याचा, संघर्षाचा आणि पुनर्जन्माचा. अनेकदा आयुष्याच्या धावपळीत, अपयशांच्या सावलीत, दुसऱ्यांच्या मतांच्या गोंगाटात हा दीप झाकला जातो. पण तो कधीच विझत नाही. तो शांतपणे, संयमाने, एका क्षणाची वाट पाहत राहतो.जेव्हा तुम्ही स्वतःकडे पुन्हा एकदा पाहाल आणि तुमच्यातील ताकदीची जाणीव करून घ्याल.तुम्ही परिस्थितीचे बळी नाही.तुम्ही त्या प्रत्येक अंधारावर मात करू शकणारे योद्धे आहात.

जग तुमच्या विरोधात बोलले, परिस्थिती अवघड झाली, मार्ग धूसर झाला, तरीही तुमचा आत्मविश्वास हा तुमचा सर्वात मोठा साथीदार आहे. दुसऱ्यांच्या शंका तुमचे भविष्य ठरवू शकत नाहीत. तुमची स्वप्नं तुमची आहेत.

ती तुमच्या हातूनच वास्तवात उतरतील.

कधी कधी आपण स्वतःलाच कमी लेखतो. इतर आपल्याला थांबवण्याचा प्रयत्न करतात, पण सर्वात धोकादायक गोष्ट म्हणजे आपण स्वतःलाच थांबवतो. पण हे लक्षात ठेवा, तुमच्या आत एक अतुलनीय ऊर्जा आहे. ती सुप्त असली तरी संपलेली नाही. आणि एकदा ती जागी झाली की, तुम्हाला थांबवणे जगालाही अशक्य आहे.

पहिले पाऊल उचलणे नेहमी कठीण असते. शंकेचे ओझे मनावर बसते, पण पहिल्या पावलातच तुमचा विजय दडलेला असतो. कारण जिथे धैर्य उगवते, तिथूनच चमत्कार घडायला सुरुवात होते.

तुमचा जन्म फक्त एका साध्या जीवनासाठी झालेला नाही.तुम्ही असामान्य कर्तृत्वासाठी जन्माला आला आहात.

तुमच्या मर्यादा ओलांडून पुढे जा. काल तुम्ही जिथे होता, त्यापेक्षा आज एक पाऊल जरी पुढे गेला, तरी तुम्ही विजयकडे वाटचाल करत आहात. काही लोक तुमच्यावर विश्वास ठेवणार नाहीत, पण तुम्ही स्वतःवर ठेवलेला विश्वास… तो तुम्हाला पर्वत हलवण्याची शक्ती देतो.

तुमचं खरं रूप अजूनही जगासमोर आलं नाही.कारण ते अजून घडत आहे.तुमच्या संघर्षांतून, तुमच्या स्वप्नांतून, तुमच्या प्रयत्नांतून.

आतल्या प्रकाशाला जागं करा.तो तुमचा आहे.अमोल, अमोघ, अचल.तुमचा आत्मविश्वास हीच तुमची ओळख आहे.त्याला उजळू द्या, चमकू द्या… आणि जगाला दाखवा की तुम्ही कोण आहात.उठा. स्वप्न पहा. प्रयत्न करा. आणि स्वतःमधील शक्तीला जागे करा.

© दीपक पवार (संपादक) खान्देश माझा