उत्तरे प्रत्येकाकडे असतात.....!

उत्तरे प्रत्येकाकडे असतात.....!

उत्तरे ही प्रत्येकाकडे असतात, पण ती नेहमी शब्दांत मांडली जातीलच असं नाही. काही उत्तरं आवाजात नसतात, ती माणसाच्या जगण्यात उतरलेली असतात. म्हणूनच काही लोक गप्प असतात.कमतरतेमुळे नाही, तर परिपक्वतेमुळे.

शांत माणूस अनेकदा गैरसमजाचा बळी ठरतो. त्याच्या शांततेला दुर्बलता समजली जाते, त्याच्या मौनाला अपुरेपणाचं लेबल लावलं जातं. पण खरं पाहिलं तर शांतता ही कमकुवतांची ढाल नसते; ती स्वतःची दिशा ठाऊक असणाऱ्यांची ओळख असते. ज्यांना आपण कुठे उभे आहोत हे माहीत असतं, त्यांना प्रत्येक वळणावर घोषणा करावी लागत नाही.

प्रत्येक वादाला उत्तर देणं ही बुद्धिमत्ता नसते. कधी कधी ते आतल्या असुरक्षिततेचं द्योतक असतं. स्वतःवर विश्वास असेल, तर प्रत्येक प्रश्नाला लगेच प्रत्युत्तर द्यावंसं वाटत नाही. काही वेळा मौन हेच सर्वात ठोस उत्तर ठरतं. कारण शब्द जिंकवू शकतात, पण मूल्येच माणसाला उभं ठेवतात.

जे तत्वांवर जगतात त्यांना सतत स्पष्टीकरण देण्याची घाई नसते. त्यांना माहीत असतं.वेळच सर्वात प्रामाणिक साक्षीदार आहे. आज न समजलेली भूमिका उद्या आपोआप स्पष्ट होते. आज दुर्लक्षित झालेली शांतता उद्या अर्थ घेऊन उभी राहते. वेळ त्यांच्या उत्तरांचं काम करून देते, कोणत्याही गदारोळा शिवाय.

काही जण बोलत नाहीत कारण त्यांना स्वतःशी प्रामाणिक राहायचं असतं. लोक काय म्हणतील यापेक्षा आपण काय आहोत याला ते अधिक महत्त्व देतात. शब्द कमी असले तरी त्यांची भूमिका ठाम असते.त्यांच्या जगण्यात विसंगती नसते.म्हणजेच त्यांना स्वतःला सिद्ध करण्याची गरज भासत नाही.

लोक समजून घेतीलच असं नाही, आणि ते त्यांना मान्य असतं. कारण बाहेरच्या जगाला समजावण्यापेक्षा स्वतःला समजावणं त्यांना अधिक महत्त्वाचं वाटतं. अंतर्मनाशी प्रामाणिक राहणं हीच त्यांची खरी जिंकलेली लढाई असते.

शांततेतही मोठं उत्तर लपलेलं असतं. ते उत्तर शब्दांचा आवाज करत नाही, पण आयुष्यभर उमटत राहतं. म्हणूनच काही लोक गप्प असतात.कारण त्यांची उत्तरं आवाजात नाहीत, तर तत्वात बसलेली असतात. आणि अशी उत्तरं काळाच्या कसोटीवर उतरतात, टिकतात, आणि नकळत इतरांनाही दिशा देऊन जातात.

© दीपक पवार (संपादक) खान्देश माझा